Rev 18 | MHL | STEP | Aria nain weesereya ensel oko iinan-pa orom-ikaeya urufam. Ensel nain kekanowa akena-ke. Parin onaiya orom-ikaeya miiw unowa faa, iiwawun parina kuisow arek.

Revelation of John 18

Babilon oro-boonek

1 Aria nain weesereya ensel oko iinan-pa orom-ikaeya urufam. Ensel nain kekanowa akena-ke. Parin onaiya orom-ikaeya miiw unowa faa, iiwawun parina kuisow arek. 2 Oromi feenap faremi maek, “Nefa komarka, wiisak oo, Babilon owow maneka nain nan oro-boonek. Aakisa wi sawur unowa o wiar taanep ikemik ne ewar samora pun nan wiam pipilimep ikemik. Nepa samora sira-sira o nan wiar ikomakek. 3 Moram ona wain nain miiw mua unowa wienakeya enemik. Wain eena sira samo-samora onowa nain-ke. Naapeya owow saria unowiya o wameiya sira samora onam-ikemik. Ne wi bisnis mua maa ele-eliwa wiar sesenareya maamuma kerew akena aawem-ikemik,” ensel-ke naap maek. 4 Naap ikok opor oko iinan-pa feenap fareya miimam, “Yena teeria, ni o wiar ikeman nain piipueka! Naeya o wameiya pina me onowen, ne o sirirowa nain ni me aawowen! 5 O pina onomakek nain ane-kurumeya ema saarik iinan akena urupok. Mua Maneka pina nain kema wiar wuam-ikua. 6 Ona sira samora onomakek naap nis pun naap akena kiripomaka. Ni o kiripomami kiripomowa erup arowa naap areka. Ne pina onak nain nis-ke ane-kurumami iiwawun samoreka. 7 O iiriw pokowa eliwa pokap ikua. Ne mua unowa o unuma fakeram-ikemik. O naap ikua nain wiar kema suuwap aakisa ni kakeniw naap kiripomaka. Naeya sirirowa manek akena aawemi kema beelalem-ikainok. Moram o anane unuma wame purupemi naap maem-ikua, ‘Yo owow saria-ke naap pokap ikem! Yo me apura-ke. Ne yo mua me efar umeya yo omominen, weetak akena,’ naap maem-ikua. 8 Naapeya ikoka fofa kuisow neekeriw maa samo-samora wiar imenaremi o iiwawun samorinon, feenap: umowa, kema beelalowa ne weniw maneka. Ne ikoka Mua Maneka kekanowa akena nain-ke o kiripomaya mukuna-pa iiwawun awep weeserinon.” Opora naap maek.

9 Aria naap awem-ikaeya owow unowa saria iiriw o wameiya sira samora onami maa ele-eliwa onaiya wiam karuem-ikemik nain kawus wiar urufap kema wiisarep omomikuan. 10 Ne wi kema tootonep epasia-pa iimarep ikok alu-iraparemi maem-ikaikuan, “Emawa, wiisak aa, Babilon owow maneka ne owow kekanowa nan samorariya. Aa, nena pina kiripomek nain nan-pariw nefar imenareya iiwawun samoraren, aa wiisak!” Naap maikuan. 11 Wi bisnis mua pun o omawami kema damolalep omem-ikaikuan. Moram o wiar ikok maa sesekami sesenarowa nain era wiar irinarek. 12 Wi maa feenap sesekami wiam sesenarem-ikemik, gol, siliwa, nomon siisia awilawila naap, ne omod ele-eliwa, konim ele-eliwa, konim oka akena, konim gawela ne ofa sira-sira, nomokow ele-eliwa, maa muutitik maa eneka enekiw onimik nain, aria nomon okaiw, aeniw ne nomon sii-siisiaiw, nain pun, 13 guawa, foma ikin eliwa, maa tana ikin eliwa sira-sira, wain eka, wel oliw-pa aawimik nain, wit makena ne foma, bulmakau ne sipsip, oos karis onaiya, maa naap nain. Ne wi mua pun, mia ne kukusa maa saarik wiam sesekami wiam sesenarem-ikemik. Ne aakisa bisnis era wiar puok.

14 Naapeya wi bisnis mua-ke o naap maikuan, “Maa koorma unowa no kema wiisarep aawowa nain iiwawun mesenalek. Enowa ne maa ele-eliwa, koora ele-eliwa, unowa nain iiwawun fonak. Kamenap onap kiiriw nainiw imeninan!” Naap maikuan. 15 O yoowa aawiya nain wi bisnis mua nain epasia akena-pa ikok wiar urufap kema tootonikuan. Wi eena o owawiya maa sesekami sesenarem-ikemik nain. Wi ikoka kema wiisarep omemi maikuan, “Aa emawa, wiisak aa! Owow maneka nain nan samorariya! O iiriw anane mia suuwow ele-eliwa nain suuwap konim oka akena wuap maa bala gol ne papako nomon awilawila ne omod ele-eliwa nain wuap wame iram-ikua! 17 Aakisa maa unowa nain ewursow iiwawun samorarek!” Naap maikuan.

Wi mua aas mane-maneka-pa uuwimik nain ne wiena woos mua, ne wi aasa sesenarep epa oko ikiwimik nain, ne wi aasa uuwowa-pa ikemik nain aas onaiya epasia akena-pa ipatarep ikaikuan. 18 Ne owowa nain awemi kawus urupem-ikaeya urufap alu-iraparemi maikuan, “Oo emawa, wiisak aa, owow eliwa naap nain oko-ko me ikua! Aa wiisak!” 19 Naap maemi foma wiam warep omemi maem-ikaikuan, “Oo wiisak, owowa nain nan samorarek! Aas unowa owowa nain ikiwep maa koorma ele-eliwa aawemi ikip ekapep naemi i maamuma maneka imenam-ikomamik. Ne aakisa iiwawun maa ele-eliwa nain mesenalek,” naap maikuan. 20 Ne oporo oko feenap miimam, “Aria ni owowa eena iinan-pa ikeman nain, ni Yeesus teeria, ni aposel ne ni profet, owowa nain urufap manek akena kemeleka, moram o sira samora nia onam-ikua nain Mua Maneka-ke aakisa kiripomak.”

21 Ne aria ensel oko-ke iikirap nomon saawirinowa ne ebebiria maneka nain fakerap ifera-pa wafurami maek, “Babilon owow maneka nain ikoka pun feenap wafuriwkin orainon. Oromi iiwawun mesenalinon, wi kiiriw nainiw me urufikuan. 22 Babilon owowa, oka ne ununa paowa, pia fuurowa ne puuw aluowa kiiriw nainiw me nefar miimikuan. Wi uuwow mua nainiw me uuwikuan ne wit ititowa nomon duunowa nain kiiriw me nefar miimikuan. 23 Arua kuisow-ko me wilininon, ne wi emeria mua muewowa mareweya wi muewow someka me nefar miimikuan. No samor aawon. Nena bisnis mua bisnis faowa paayar-afurap bisnis maneka onam-ikemik nain aakisa weetak. Ne miiw unowa mua unowa nain nena maikua-pa wia mufemi wia momoran. 24 Aria no yoowa aawon nain onoma feenap, wi profet ne Yeesus teeria wia ifakimiwkin wiena aka miiwa nan orok. Ae, makena, mua unowa pun wia ifakimiwkin aka miiwa nan wiar orok.”